ទាហានជើងទឹកអាម៉េរិក ម្នាក់ត្រូវបានតុលាកាសហព័ន្ធអាម៉េរិក បើកសវនាការជំនុំជម្រះកាលពីថ្ងៃពុធ ទី២០ ខែតុលា ពីបទលក់ការណ៍សម្ងាត់យោធាទាក់ទិននឹងនាវាចម្បាំងរបស់សហរដ្ឋអាម៉េរិក ទៅឱ្យមន្ត្រីចារកម្មចិន។ នេះបើយោងតាមការចុះផ្សាយរបស់សារព័ត៌មាន Nikkei Asia នៅថ្ងៃព្រហស្បតិ៍ ទី២១ ខែសីហា នេះ។
ក្រសួងយុត្តិធម៌អាម៉េរិក បានចេញសេចក្ដីប្រកាសព័ត៌មានថា ទាហានជើងទឹកអាម៉េរិក ដើមកំណើតចិន ដែលមានឈ្មោះ វ័យ ជិនឆាវ (Wei Jinchao) ហៅ Patrick អាយុ ២៥ ឆ្នាំគឺជាវិស្វករថែទាំម៉ាស៊ីននៃនាវាផ្ទុកយន្តហោះចម្បាំងធុន USS Essex នៅក្រុងស៊ែន ឌីអេហ្គោ (San Diego) រដ្ឋកាលីហ្វ័រញ៉ា។ ហើយអំឡុងពេលធ្វើការនៅលើនាវាចម្បាំងខាងលើរយៈពេលជាង ១៨ ខែ ទាហានជើងទឹកនេះបានលក់ការណ៍សម្ងាត់យោធាទាក់ទិននឹងនាវាចម្បាំងនេះឱ្យទៅចារកម្មចិន ម្នាក់់ក្នុងតម្លៃ ១២.០០០ ដុល្លារ។
ទាហានក្បត់ជាតិដែលលក់ការណ៍សម្ងាត់យោធារបស់សហរដ្ឋអាម៉េរិក ឱ្យទៅមហាយក្សចិន ដែលជាគូបក្ខដិបក្ខស៊ីសាច់ហត់ឈាមគ្នានេះ អាចប្រឈមនឹងការជាប់ពន្ធនាគារអស់មួយជីវិត ដោយការកាត់ទោសគ្រោងធ្វើនៅថ្ងៃទី០១ ខែធ្នូ ចុងឆ្នាំ២០២៥ នេះ។
សូមបញ្ជាក់ថា ករណីនេះមិនមែនជារឿងថ្មីទេនៅក្នុងការប្រកួតប្រជែងផ្នែកស៊ើបការណ៍សម្ងាត់ដែលបានក្លាយជាជំងឺរ៉ាំរ៉ៃរវាងប្រទេសមហាអំណាចទាំងពីរ ដែលតែងតែដាក់ការសង្ស័យ និងព្រួយបារម្ភអំពីការបែកធ្លាយការណ៍សម្ងាត់យោធាដល់គ្នាទៅវិញទៅមក៕
