យោងតាមរបាយការណ៍របស់ទីភ្នាក់ងារសារព័ត៌មាន AFP ដែលចេញផ្សាយកាលពីថ្ងៃអាទិត្យ ទី១៤ ខែកញ្ញា ឆ្នាំ២០២៥ បានឱ្យដឹងថា លោកស្រី Sushila Karki នាយករដ្ឋមន្ត្រីស្តីទីថ្មីរបស់ប្រទេសនេប៉ាល់ បានប្រកាសជាសាធារណៈថា រដ្ឋាភិបាលរបស់លោកស្រីនឹងធ្វើការដើម្បីឆ្លើយតបទៅនឹងការទាមទាររបស់ក្រុមបាតុករ Gen Z ដែលរួមមានការលុបបំបាត់អំពើពុករលួយ ការបង្កើតអភិបាលកិច្ចល្អ និងសមភាពសេដ្ឋកិច្ច។
ការប្រកាសនេះត្រូវបានធ្វើឡើងក្នុងអំឡុងពេលសុន្ទរកថាជាលើកដំបូងរបស់លោកស្រី Karki ចាប់តាំងពីលោកស្រីបានចូលកាន់តំណែងជាផ្លូវការកាលពីថ្ងៃសុក្រ ទី១២ ខែកញ្ញា ឆ្នាំ២០២៥។ លោកស្រីបានអំពាវនាវដល់ប្រជាជនឱ្យគាំទ្រយ៉ាងពេញទំហឹងចំពោះបេសកកម្មនេះ។ មុនពេលចាប់ផ្តើមការប្រជុំនៅឯព្រះបរមរាជវាំង Singh Darbar ដែលជាទីតាំងរដ្ឋាភិបាល និងអគារមួយចំនួនត្រូវបានដុតបំផ្លាញក្នុងអំឡុងពេលបាតុកម្ម លោកស្រី Karki ដែលមានវ័យ ៧៣ ឆ្នាំ និងជាអតីតប្រធានតុលាការកំពូលស្ត្រីដំបូងគេបង្អស់របស់នេប៉ាល់ បានឈរគោរពវិញ្ញាណក្ខន្ធរយៈពេល ១ នាទី ដល់ជនរងគ្រោះដែលបានស្លាប់បាត់បង់ជីវិត។
មេដឹកនាំថ្មីរបស់នេប៉ាល់ត្រូវបានតែងតាំងឡើង បន្ទាប់ពីមានការចរចាដ៏តានតឹងរវាងមេបញ្ជាការកងទ័ព លោកឧត្តមសេនីយ៍ Ashok Raj Sigdel ប្រធានាធិបតី Ram Chandra Paudel និងតំណាងក្រុម Gen Z ដែលជាចលនាបាតុកម្មរបស់យុវជន។ ក្រុមអ្នកតស៊ូមតិវ័យក្មេងរាប់ពាន់នាក់បានប្រើប្រាស់កម្មវិធី Discord ដើម្បីស្នើឈ្មោះលោកស្រី Karki ជាបេក្ខជនសម្រាប់តំណែងមេដឹកនាំស្តីទី។
លោកស្រី Karki បានបញ្ជាក់ថា លោកស្រីមិនបានស្វែងរកតំណែងនេះទេ ប៉ុន្តែត្រូវបានតែងតាំងដោយក្រុមបាតុករដែលបានបង្ហាញកម្លាំងរបស់ពួកគេនៅតាមដងផ្លូវ។ ក្រោយពីការតែងតាំងលោកស្រី រដ្ឋសភាត្រូវបានរំលាយដើម្បីរៀបចំការបោះឆ្នោតថ្មីនៅថ្ងៃទី៥ ខែមីនា ឆ្នាំ២០២៦។
ក្នុងសុន្ទរកថារបស់លោកស្រីនៅថ្ងៃអាទិត្យ លោកស្រី Karki បានអះអាងថា រដ្ឋាភិបាលស្តីទីនឹងមិននៅកាន់តំណែងលើសពី ៦ ខែឡើយ ហើយនឹងប្រគល់ភារកិច្ចទៅឱ្យរដ្ឋសភា និងគណៈរដ្ឋមន្ត្រីថ្មី។ លោកស្រីបានសង្កត់ធ្ងន់ថា កិច្ចការនេះនឹងមិនអាចសម្រេចបានឡើយ បើគ្មានការគាំទ្រពីប្រជាពលរដ្ឋ។
ស្របពេលជាមួយគ្នានេះ លោក Paudel ដែលជាអ្នកធ្វើពិធីស្បថចូលកាន់តំណែងរបស់លោកស្រី Karki បានថ្លែងកាលពីយប់ថ្ងៃសៅរ៍ ទី១៣ ខែកញ្ញា ឆ្នាំ២០២៥ ថា បន្ទាប់ពីដំណើរការ និងស្ថានការណ៍ដ៏ស្មុគស្មាញ និងលំបាក ប្រទេសនេប៉ាល់ទីបំផុតបានរកឃើញដំណោះស្រាយដោយសន្តិវិធី។
