រុស្ស៊ីថ្កោលទោសការប្រើពន្ធរបស់អាមេរិកដើម្បីដាក់សម្ពាធឥណ្ឌាជុំវិញការទិញថាមពលពីរុស្ស៊ី
**************
រុស្ស៊ីបានចោទប្រកាន់សហរដ្ឋអាមេរិកពីបទដាក់សម្ពាធពាណិជ្ជកម្មខុសច្បាប់លើប្រទេសឥណ្ឌា បន្ទាប់ពីប្រធានាធិបតីអាមេរិក Donald Trump បានគម្រាមដំឡើងពន្ធឡើងវិញលើការនាំចូលរបស់ឥណ្ឌាសម្រាប់ការទិញប្រេងពីរុស្ស៊ី ដែលជាកម្មវត្ថុនៃទណ្ឌកម្មអន្តរជាតិដែលផ្តើមចេញពីជម្លោះរុស្ស៊ី-អ៊ុយក្រែន។
អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយនៅថ្ងៃនេះថា រុស្ស៊ីបានឮសេចក្តីថ្លែងការណ៍ជាច្រើនដែលជាការគំរាមកំហែងពិតប្រាកដ ការប៉ុនប៉ងដាក់សម្ពាធប្រទេសនានាឱ្យផ្តាច់ទំនាក់ទំនងពាណិជ្ជកម្មជាមួយរុស្ស៊ី ហើយមិនបានចាត់ទុកថាសេចក្តីថ្លែងការណ៍ទាំងនេះស្របច្បាប់នោះទេ។ រុស្ស៊ីជឿថាប្រទេសអធិបតេយ្យគួរតែមានសិទ្ធិជ្រើសរើសភាពជាដៃគូពាណិជ្ជកម្ម និងសេដ្ឋកិច្ចផ្ទាល់ខ្លួន ហើយគួរតែមានសិទ្ធិជ្រើសរើសទម្រង់នៃកិច្ចសហប្រតិបត្តិការពាណិជ្ជកម្ម និងសេដ្ឋកិច្ចដែលជាផលប្រយោជន៍ផ្ទាល់ខ្លួន។
លោកប្រធានាធិបតី Trump បានប្រកាសកាលកំណត់ថ្មី៖ ចូលជាធរមាននៅថ្ងៃសុក្រ ទី៨ ខែសីហា លោកនឹងដាក់ទណ្ឌកម្មថ្មីលើរុស្ស៊ី និងប្រទេសដែលទិញប្រេង និងថាមពលពីរុស្ស៊ី លុះត្រាតែរដ្ឋាភិបាលរុស្ស៊ីចាត់វិធានការដោះស្រាយជម្លោះជាមួយអ៊ុយក្រែន ដែលបានបន្តអស់រយៈពេលជាងបីឆ្នាំកន្លះ។ ទោះបីជាយ៉ាងណាក៏ដោយ ប្រធានាធិបតីរុស្ស៊ី លោក វ្ល៉ាឌីមៀ ពូទីន មិនបានបង្ហាញពីការផ្លាស់ប្តូរជំហររបស់គាត់ទេ បើទោះបីជាពេលវេលាកំណត់របស់លោក Trump ខិតជិតមកដល់ក៏ដោយ។
រដ្ឋាភិបាលឥណ្ឌាបានហៅការគំរាមកំហែងរបស់លោក Trump ថាមិនមានការធានា ហើយបានប្តេជ្ញាការពារផលប្រយោជន៍ពាណិជ្ជកម្មរបស់ខ្លួន ដោយប្រភពពីរដ្ឋាភិបាលឥណ្ឌាពីមុនបាននិយាយថា ឥណ្ឌានឹងបន្តទិញប្រេងពីរុស្ស៊ី ទោះបីជាមានការគំរាមកំហែងពីលោក Trump ក៏ដោយ។
ប្រែសម្រួល៖ ហូរ មុនីវ័ន្ត
ប្រភព៖ រ៉យទ័រ
