Meta បានបើកដំណើរការមុខងារថ្មីមួយដ៏អស្ចារ្យក្នុងវិស័យបច្ចេកវិទ្យា AI ដោយប្រើ Meta AI Translations ដើម្បីបកប្រែអូឌីយ៉ូនៅក្នុងវីដេអូឲ្យទៅជាភាសាផ្សេងៗ។ មុខងារនេះបានចូលរួមជាផ្នែកមួយនៃការបង្កើនសមត្ថភាពស្មាតក្នុងបណ្តាញសង្គម Facebook និង Instagram របស់ Meta។ អ្វីដែលគួរឱ្យចាប់អារម្មណ៍ជាពិសេសគឺ ប្រព័ន្ធនេះអាចរក្សាបានសម្លេងដើម អារម្មណ៍ និងចលនាបបូរមាត់ ឲ្យស្រដៀងនឹងការនិយាយក្នុងភាសាថ្មី។
មុខងារនេះត្រូវបានប្រកាសជាផ្លូវការនៅក្នុងសន្និសីទ Meta Connect កាលពីឆ្នាំមុន ហើយបានសាកល្បងលើមាតិកា Reels របស់អ្នកបង្កើតមួយចំនួន។ ការបកប្រែអូឌីយ៉ូជាភាសាថ្មីត្រូវបានធ្វើដោយស្វ័យប្រវត្តិ ហើយអ្នកបង្កើតមាតិកាអាចពិនិត្យមើលនិងកែសម្រួលមុនពេលបង្ហោះផ្សព្វផ្សាយបានផងដែរ។
មុខងារសំខាន់ៗរបស់ Meta AI Translations រួមមាន៖
• បកប្រែអូឌីយ៉ូដោយស្វ័យប្រវត្តិ ព្រមទាំងការសម្របសម្លេងនិងចលនាបបូរមាត់ឲ្យស្របតាមភាសាថ្មី។
• គាំទ្រភាសាចម្បង ២ ដំបូងគឺ អង់គ្លេស និងអេស្ប៉ាញ។ ភាសាផ្សេងទៀតនឹងត្រូវបន្ថែមនាពេលឆាប់ៗនេះ។
• អាចប្រើបានក្នុងវីដេអូខ្លី ដូចជា Reels ដែលជាប្រភេទមាតិកាដ៏ពេញនិយមនៅលើ Facebook និង Instagram។
• បង្កើនឱកាសឲ្យអ្នកបង្កើតទទួលបានទស្សនិកជនថ្មីៗ ដោយជួយឆ្លើយតបបញ្ហាឧបសគ្គភាសា។
Meta ថា វីដេអូដែលបានបកប្រែដោយ AI នឹងត្រូវបានសម្គាល់ជាសាធារណៈថាជាការបកប្រែដោយប្រព័ន្ធ Meta AI ដើម្បីរក្សាការត្រឹមត្រូវនៃខ្លឹមសារនិងជៀសវាងការភាន់ច្រឡំ។
ដើម្បីឲ្យប្រព័ន្ធនេះធ្វើការដោយមានប្រសិទ្ធភាពខ្ពស់ អ្នកនិយាយត្រូវមើលផ្ទាល់ទៅកាមេរ៉ា ប្រើសម្លេងច្បាស់ និងកាត់បន្ថយសម្លេងរំខាន ឬភ្លេងផ្សេងៗនៅក្រៅខ្លឹមសារនោះ។ នេះនឹងជួយឲ្យការបកប្រែអូឌីយ៉ូមានភាពច្បាស់លាស់ និងធ្វើការផ្លាស់ប្តូរបានស្រួល។
Meta មិនត្រឹមតែចង់ឲ្យអ្នកបង្កើតមាតិកាមានឱកាសបង្ហាញខ្លួនតែសម្រាប់ទស្សនិកជនក្នុងប្រទេសរបស់ខ្លួនទេ។ តាមការបញ្ជាក់ពីក្រុមហ៊ុន មុខងារ AI Translations នឹងគាំទ្រភាសាបានដល់ទៅ ២០ ភាសា និងអាចបង្ហាញចំនួនអ្នកទស្សនា តាមភាសានិមួយៗ ដើម្បីជួយឲ្យអ្នកបង្កើតយល់ពីឥទ្ធិពលនៃមាតិការបស់ខ្លួនជាច្បាស់។
ប្រព័ន្ធនេះជាជំហានដ៏សំខាន់មួយទៀតសម្រាប់ AI ជាឧបករណ៍ជំនួយចម្បងក្នុងការផ្លាស់ប្តូរផ្លូវការផលិត និងចែកចាយមាតិកាឌីជីថលក្នុងសតវត្សទី ២១។
